【本報訊】碼頭工潮陷於膠着狀態，負責斡旋的勞工及福利局局長張建宗卻採取龜縮態度。據悉張建宗日前主動接觸職工盟核心，想游說工會單方面讓步，重返談判桌，又暗示政府「搞唔掂HIT」。有職工盟核心批評張「冇用」，竟選擇向財團屈服，表明除非HIT肯回應他們的訴求，否則絕不讓步，「大家預咗冇份工同轉行。」
貨櫃碼頭工潮發展到現階段，外判商高寶揚言結業，HIT及其母公司和黃拒絕回應罷工工人的訴求。據了解工會、罷工工人立場堅定，堅持HIT一定要參與談判，不能置身事外，「高寶執笠都好，HIT都要負責，因為我哋係爭取成個行業加薪」。
絕不退縮「預咗冇份工」
罷工工人亦有心理準備會失去工作，甚至轉行，所以絕對不會退縮：「𠵱家係為行業工人爭取，就算冇咗份工，大不了去做地盤，揸天秤，人工唔會少過喺碼頭做。」
至於曾經表明會積極斡旋的政府，勞福局局長張建宗近日已經不敢再說有信心解決工潮。據了解，張日前主動接觸職工盟核心，想了解「工潮點行落去」。有知情人士表示，張目前最想罷工工人重回談判桌，「係咁叫工人冇高寶、HIT代表都傾住先」。
工會則促請張向HIT施壓，逼對方回應工會訴求，但張卻「𠵱𠵱哦哦」，「即係政府搞唔掂HIT、李嘉誠，反過嚟叫工會跪低。」
有勞工界人士直言，特首梁振英選特首時，曾揚言與商界無特殊關係，亦無懼地產霸權，但其政府卻不敢開罪財團，要工人屈服：「成件事入面，我睇唔到政府、張建宗斡旋做到啲乜嘢，最成功係夾硬塞工聯會入嚟談判，幫佢哋攞彩。」