季尾想睇好波，有時講彩數，因為hea波特多，但賭波卻可收窄出擊範圍，戰意屬呢個階段重要指標，今周心水指向要搶W先掂嘅狂野之輩！其中重心想博英冠主場極狂嘅保頓，由季初下游火速爬升，已上到第7，回升已非不可能，但今場要必𡁻米堡才有價講。有得睇，今晚續取又成冷門嘅「黑貓」新特蘭，狂人主帥夠晒照；而明晚獨選鬥車仔從來夠狂嘅利記。
今屆小弟貼英冠信心度同比率比過去幾屆大減，冇計，「現在台」寧願撐三數百人入場嘅本地波，都唔肯再花錢購入一些世界二、三線聯賽直播權，英冠都畀佢哋cut埋，冇得做功課；但睇開傳統英式足球大嘅小弟，喺柱躉中鋒近末落、高Q大腳唔馨香嘅英超，啱啱好難得睇到槌仔幫嘅安祖卡路爾點樣炸爆紅魔防線，越夜越過癮，呢位狂野look「高大帥」博下屆有着落，先至咁賣力。其實英冠都大把呢類硬橋硬馬賽事，不過唔知今屆升班附加賽有冇得播？
今屆降落英超嘅3雄保頓、布力般同狼隊，後兩者仲要喺護級漩渦打滾，折墮！惟有保頓爭氣，自2月尾後錄得8勝3負未和過升到第7，距入到前6附加賽只差1分；隊波入球能力平均，前3位射手包括上屆踢英超嘅伊高斯、尼高治及奇雲戴維斯，仲有下半季復出生猛嘅李青龍，喺英冠呢個班底已稍超。睇主場戰績，竟能排到第2僅次已篤定升班嘅卡城，主場王也；今場對手、客軍米杜士堡排後保頓3級，剩番3場實際已冇乜機會入到前6，齋睇上述死數據，足開1.68倍主W兼博[-1]。
新特蘭上仗大炒紐記3蛋揚威東北打吡，有睇過嘅球迷都會認同黑貓踢得好有朝氣，係上個禮拜日好精采嘅一場直播波。由狂人迪肯尼奧教起碼肯加快行軍速度、主動搶攻，打開紐記兩截；教過英甲史雲頓，嚟到英超為黑貓救亡，狂人呢套戰術啱用！今次返主場鬥愛華頓，後者剛周中硬撼阿仙奴和波，耗力唔少；由南又去番北作客光明球場，相信客軍會推返爆炸頭費蘭尼上前攻堅打返傳統英式多啲，硬撼硬，呢場波入球唔會少，但信新特蘭保命戰意會比其實踢到前4去到歐聯機會唔高嘅愛華頓強，進取押主W，下盤則望食完再食。
最後取近期又被弱旅玩殘嘅利記，明晚鬥車仔打場爭氣波；從來鬥強隊醒神得多，相反車仔戰線廣且密，表現必反覆；對賽紅軍近6戰得4勝1和1負，孭飛球隊發力狂轟名牌車仔，先係利記近年作風，有賠率何妨要生活好，押利物浦。（下次見報日期：27/04）