【灣仔】郭富城同熊黛林七年之癢，分手收場，有指苟芸慧係小三，尤其城城日前護苟棄熊嘅態度，令呢段三角關係複雜迷離。熊黛林前日繼續左手尾指戴「分」戒，強調回復單身，訪問期間眼濕濕兼扁晒嘴，仲含淚反擊：「我唔知邊個先應該喊！」可惜出埋喊功都似乎留唔住城城。
甩拖城城前晚6點幾去咗灣仔謝斐道嘅保如大廈玩通宵，嗰幢大廈有好多雀會，據聞佢係去咗打麻雀。噚日朝早6點幾佢先落樓，玩足12粒鐘殘爆嘅城城見到記者好愕然，即刻戴番黑超行去停車場畀錢，佢喺成叠錢嘅名牌銀包拎咗三百幾蚊出嚟，問到成晚去咗邊？佢就話：「同啲friend一齊，傾偈。」傾咗乜呢？佢話：「做嘢囉。」有冇講吓感情？上咗林寶堅尼嘅佢風騷話：「冇喎！」佢全程心情靚爆，未知係因為打麻雀有斬獲，定係撇甩黐身熊大解脫呢？有指熊黛林噚日去咗韓國血拼療情傷。
蒙嘉慧撐肥苟單純
另一方面，蒙嘉慧（YoYo）前晚喺尖沙嘴出席活動時力撐喺無綫劇集《仁心解碼II》中合作過嘅苟芸慧：「佢好單純、好努力工作，有時兩、三take做得唔好都好激動，相信佢係簡單同好人，唔識表達自己，相信佢唔係第三者。」提到城城同熊黛林七年就分，但YoYo同老公鄭伊健七年就結婚，佢話每個人都有自己諗法喎。
採訪、攝影：楊浩賢、徐錦池、梁錦雯
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/