一生醉心粵劇、演過180多部電影、劇集，人稱「容姨」的譚倩紅，自演出《真情》的容姨後，令她由紅姨變成了18年後大家仍然記得的容姨。容姨年屆81歲，記憶力依然驚人，那一年、那個月份，在那裏打拼，她仍記憶猶新。43年，譚倩紅跟粵劇名伶任劍輝學戲，開始了璀璨人生，今年是容姨踏足演藝圈70年，她舉行了首個個唱，令其演藝人生路更圓滿。
撰文：溫敏芝
譚倩紅一生裏參演的電影、粵劇多數不勝數，香港電影資料館也有紀錄，產量驚人，由12歲的「妹妹仔」默默耕耘，四處飄泊走埠踏台板，今日的容姨回顧一生的演藝之路，璀璨但慨嘆時光飛逝。今晚容姨會在北角新光戲院舉行一場「譚倩紅 倩影紅氈70載」演唱會，以紀念她縱橫演藝界70年的大日子，除有任冰兒、蓋鳴暉任嘉賓，獻唱無綫處境劇《真情》主題曲的李樂詩，在結尾部份更會帶領一班劇中演員薛家燕、劉丹、梁舜燕及鄭子誠等出場，與大家一起集體回憶。
拜任劍輝門下學戲
容姨記憶力驚人，何年何月在做甚麼，她都記得清清楚楚，當年12歲的譚倩紅，遇上日本佔領香港的淪陷時期，機緣巧合下，跟了粵劇名伶任劍輝加入戲行，她說：「嗰時我喺澳門住，啱啱讀完書，碧姐（鄧碧雲）住喺我樓上，我細個好鍾意跟碧姐入後台睇佢做戲，慢慢就熟咗，初初我唔係想跟任姐，想跟碧姐做花旦，點知碧姐接咗去廣州做戲，嗰陣時廣州好亂，我得12歲，佢唔敢帶我去，就叫我不如跟任姐，不過嗰時嘅師傅唔係今時今日嗰種，真係執住隻手教你，我哋叫開山師傅，係一支盲公竹帶你入行，之後發展成點樣係閣下嘅事，要邊做邊學，不過任姐人好好，一啲都唔惡，亦從來唔鬧人，佢一見你只會讚你，話我乖又孝順，叫我畀心機學嘢。」
投身電影拍戲百部
跟了任姐兩年，45年終於太平，譚倩紅來了香港，但學戲之路仍然艱辛，她說：「初初就由最尾嘅花旦仔做起，好彩我貴人多，又由香港去咗廣州嘅劇團，之後再有機會去新加坡、檳城、吉隆坡及越南等地走埠，總之邊度有戲做就去邊，慢慢由包尾花旦、再去第四、第三、第二花旦，最後去到正印花旦。」直至54年去越南走埠後，譚倩紅終停下來，留守香港作主要基地，並開始投身電影圈，之後一拍就拍了百多部電影。她說：「嗰時拍戲好蓬勃，做完大戲夜晚收工仲要拍戲，不過我都係鍾意粵劇，可以睇到觀眾第一個反應。」直至67年底，譚倩紅產女，便專心相夫教女，一別影壇二十年，到87年才復出接拍電影，她說：「其實我都冇諗過再做番戲，但我老公話知我好鍾意呢行，加上個女都20歲，有佢哋支持先出返嚟。」
容姨一角深入民心
90年代，譚倩紅加入無綫，95年《真情》中「容姨」一角，18年後大家仍然印象深刻，她說：「我喺無綫十一年拍咗五部處境劇，好似《茶煲世家》、《真情》同埋《公私戀事多》等，拍《真情》個個都當我係容姨，一班演員成日聚會好似一家人咁，容姨呢個角色都算係我代表作，係一個好慈祥嘅人物，到今時今日好多人仲叫緊我容姨，唔係叫紅姨，《真情》拍咗四年半，個劇佔咗我人生好重要嘅一部份，好開心相隔18年，大家都仲記得我。」如今，已退休的容姨，閒時也會登台唱粵曲，但劇集就不拍了，畢竟年紀大，要以健康為重。
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/