有亞視員工前年撰寫匿名信，向前廣播事務管理局投訴亞視主要投資者王征違規操控亞視，其實王征入主亞視後，騎呢事件一浪接一浪，唔少亞視行家都做到意興闌珊，好多人都頂唔順劈炮，最新加入劈炮名單嘅人，就係亞視新聞部台柱李彤。
聽聞噚日已經係彤姐last day，佢劈炮嘅消息震驚新聞界，皆因佢係亞視老臣子，喺亞視做咗十幾廿年，去過70個國家近200個城市採訪新聞，而專跑內地新聞嘅彤姐，由1994年起夾夾埋埋做過廿次兩會，四屆黨大會。有行家猜測，彤姐劈炮嘅導火線，可能係前年亞視誤報前國家主席江澤民嘅死訊，據講當時有人要求佢主持特備節目，但彤姐收到嘅消息係老江仍然健在，所以話明如果要佢出鏡寧願唔撈。
不過，彤姐噚日喺facebook留言冇交代出走原因，只簡單留下一句：「衷心感謝大家的支持和包融，十多年了，先休息一會。」