【大坑】早排喺曾志偉迪士尼生日會大唱粗口歌嘅謝天華，前晚掉低老婆同一名妙齡馬尾妹去大坑一間餐廳酒吧飲酒吹水。佢哋前晚10點幾到，專登揀咗近路口嘅位坐，方便天華食煙。曾因醉駕被停牌嘅天華，好乖只係叫咗杯非酒精飲品，嗰位少女反而叫咗杯雞尾酒飲。
個少女染頭髮、戴cap帽束起馬尾，衣着同氣質較平實，跟之前同天華傳過緋聞嘅王璐瑤（LuLu）唔同。一坐低馬尾妹已經滔滔不絕，天華原本都食住煙有問有答，但去到中段已經後勁不繼，望落有啲攰只用笑容同點頭回應，但煙就冇停一直燒，煙灰缸都俾佢填滿。
紅燈照衝
兩個人坐低傾咗差唔多兩個鐘，天華就同嗰位馬尾妹上車離開。全情笑容滿面嘅馬尾妹上到車依然未停口，天華架車先由大坑道右轉入高士威道，再左轉入維園嘅興發街時車速並不高，但去到興發街右轉永興街燈位時，佢居然冇理紅燈照轉，非常危險。汽車駛到皇悅酒店門口停低，天華同少女喺車廂再傾一分鐘，嗰位少女先落車揮手依依不捨離去。
採訪、攝影：楊浩賢、徐錦池
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/