民建聯本周一誕生嘅中委名單，粗口大狀馬恩國榜上無名，已經令好事之徒大失所望，八方聽聞，今日出爐嘅新領導層擺位，更加一啲驚喜都冇。如無意外，秘書長彭長緯守得雲開見月明，升呢做副主席專責搞黨務，而近年曝光頻頻嘅新界社團聯會理事長陳勇，就會獲選為新增副主席，專責搞地區動員。其他三位原副主席包括李慧琼、蔣麗芸同張國鈞，則會留任做副手。至於主席一職嘞喎，譚耀宗會繼續冧莊，據知至少等李慧琼夠晒火候上到位，先至可以退休囉。政府搞全城動員，建制派當然唔執輸，但佢哋當然以政改為目標。八方聽聞佔領中環調查只係第一擊，之後重鎚陸續有嚟。