港股連續第五個交易日下跌，近期走勢應該可以用𣲷嚟形容，個別股份跌到令人摸不着頭腦，例如隻合和實業（054），噚日插3.6%，去到28.3元，兩個月累積下跌咗兩成，以合和嘅波幅嚟計，已經算跌得急。
究竟因乜鬼股價咁削？晉佳諗到原因有三個，第一，樓市轉升為跌，可能打擊合和推盤計劃，公司原本計劃今年年頭推出利東街項目「囍匯」出售，結果推遲到3月尾申請預售樓花同意書，點知遇正樓市冷鋒，分分鐘樓價仲見埋頂，原本「囍匯」話今季推，都唔知最終成唔成事，股價即時少個憧憬因素。
第二，合和揸住68%嘅合和公路（737）跌到阿媽都唔認得，前景黯淡。合和公路佔合和實業嘅資產值只有16%，估計長遠拖累唔大。
第三，環球低息周期維持唔到幾耐，對資產價格形成打擊。合和實業本身揸實物業佔總資產八成，所以估值出現壓力。
少有震倉 走勢易捉
港股被摧殘咗兩個月，合和股價亦落番去嚿年10月晉佳推介時水平。計番估值，市賬率跌落去0.78倍左右，加上合和中心一、二期重組租戶組合嘅空間大，低估值同高潛力應該可以抵銷到加息憂慮，相對其他收租股吸引。但各位要買合和大可歎慢板，等股價跌夠再有回升迹象先買番，唔需要跌緊嘅時候瞓身去撈。睇番佢可愛嘅地方，就係股價長升直插，少有震倉，呢類股份走勢易捉，贏錢往往難度唔大，一於等股價回升初期先買，以市賬率0.9倍計價，目標價32.60元。
之前晉佳推介敏華（1999），點知一見報咁唔好彩，就遇正發換股債籌8.5億元，股價連跌兩日，幅度7.6%。點解跌咁多，第一，中期淨現金接近5億元，都要集資多8.5億元，外界對發債舉動非常意外；第二，換股債規模相當大，一旦換股就涉及發行1.03億股，每股盈利攤薄效應達到一成，股價跌7.6%，相信足夠反映發債影響，如果再跌得多，就反而反映市場覺得隻股唔係咁妥，所以呢一刻惟有轉為觀望。
晉佳
本欄逢周一、三及五刊出