公民黨陳淑莊Tanya上年搞talk show大收旺場，今年決定再接再厲，6月中推出《講女烈傳二之出得嚟『環』》，收益扣除成本後，撥捐協助智障兒童嘅勵智協進會。Tanya話今次幫呢個慈善機構，事緣佢同莫文蔚媽媽喺市建局共事過，而莫媽媽正係呢個會嘅顧問；至於個「出得嚟『環』」點解？佢大賣關子，話大家可以發揮想像力喎。對於海報中攞住個元寶咁鬼邪，佢就話百無禁忌，只係唔想用個別銀行鈔票做道具，所以咪搞搞新意思囉。
上次Tanya着婚紗出show令觀眾嘩嘩聲，今次佢就講明唔會返頭着婚紗，但衣着上會較上次「更少啲布」。上次捧過佢場嘅朋友，包括緋聞男友Masta Mic，同埋黃子華、黃耀明同劉天蘭等，都已群星拱照拍片撐佢開騷，嚟緊大家喺Tanya嘅facebook就會睇到。