民建聯觀塘區議員陳百里有黨友關照，升呢做黨友蘇錦樑嘅政治助理，搞到坪石選區要補選。觀塘一向係民建聯陳鑑林老巢，今次陳百里出走，陳鑑林兒子陳俊傑即頂上參選。早前幾次補選，泛民都爭崩頭參選，今次卻冇泛民肯出戰，補選報名噚日截止，長毛梁國雄話睇唔過眼建制派自動當選，噚日趕尾班車報名參選。長毛呢排忙住拉布，邊仲有時間拉票呀﹖長毛話冇計，惟有喺拉布以外嘅時間落區，仲話自己住喺啟業邨，同坪石好近，係半個街坊。社民連副主席吳文遠話噚日朝早先決定派人參選，而長毛狙擊建制派效果最好，所以拉布再忙都要出戰。