由六四學運領袖王丹創立的華人民主書院，嚟緊又有新搞作，就係計劃由6月中起，為準備參加非暴力抗爭嘅人士，舉行一連兩日嘅「非暴力抗爭工作坊」。書院期間除咗會請嚟自本土嘅社運人士，例如社民連主席長毛、陶君行等分享，亦計劃邀請大狀如李柱銘、吳靄儀等，從法律角度講吓乜嘢叫做「非暴力抗爭」，教示威者點保障自己。
書院亦計劃邀請美國專門研究通過非暴力行為，去捍衞自由、民主嘅愛因斯坦研究所（Albert Einstein Institution），派專家來港同學員分享。八方聽聞，書院初期只會邀請有社運經驗人士出席，每班最多30人，稍後先會逐步開放畀公眾報名，所以有興趣嘅人士，要密切留意書院日後公佈嘞。