「富豪飯堂」福臨門計劃開廠搞包裝食品業務。福臨門股權糾紛告一段落，故事卻未完，七哥徐維均收錢離場後，傳聞積極籌備開間新福記打對台，福臨門就意圖借殼華人飲食（8272）上市大展拳腳，頭炮係喺香港開廠！
華人飲食前晚公佈，傾緊成立一間樓面面積三萬平方呎嘅食品製造廠，「日後可能發展品牌烘焙糕點、熟食及包裝食品業務」。接管福臨門嘅五哥徐沛鈞，佢阿仔徐德強噚日話成件事仲計劃緊，點都唔講賣乜。
唔肯講會賣乜
有飲食界朋友就分析，福臨門𠵱家靠香港同九龍兩間福臨門，收入有限，加開分店唔吃香。福臨門最大嘅價值就係呢個品牌，用呢個品牌推出包裝食品反而有得做，毛利又高。
舉例，近年好多著名中菜館推出罐頭或包裝鮑魚，幾百蚊一罐，市場好受落；高檔品牌嘅月餅、賀年糕點亦大賣，半島酒店嘉麟樓月餅咪賣到驚動警察囉，唔少自由神除咗來港掃金掃袋，亦好喜歡掃入呢啲有品牌嘅食品送禮或自用顯身份。
誓成自由神新寵
好似福臨門月餅確實矜貴，每年限量賣畀熟客，廚房趁落場同放工先慢慢整，舊年一盒兩個賣二百幾蚊，如果公開發售肯定成為自由神新寵。咁究竟今年中秋有冇得賣呢？華人飲食方面話搵緊地方，暫時答唔實。
李華華
mailto:[email protected]