最近有報導話有一啲紡織製衣界人士有見於內地工資上升，地價上升，成本優勢相對於香港，不再明顯，因此有意將成衣業帶回香港，將深水埗變成成衣貿易中心，甚至將一啲高端成衣在港製造。
講吓無所謂嘅，但製造業如果要真的回流，幾近不可能，第一就係本港廠房太貴，第二就係香港何來陳寶珠式（粵語片時代）嘅工廠女工、車衣工人？1985年工業開始大規模北移之時入廠做女工嘅二十歲青春少女，今年已經48歲，大部份在50歲以上，新一代年青女子，1992年後出生嘅，有邊位有興趣做工廠車衣女工呀？或者因為科技進步，車衣電腦化，自動化，都要搵到一大班年青人肯入行，受培訓嚟控制電腦先。
香港教育近二十年來因大學學位增加，學生第一志願係讀大學，然後係入讀私立大學或副學士，就係唔多肯做技術工人，情況與美國差不多。金融時報一位專欄作家Edward Luce（四月十五日）在專欄講，奧巴馬及不少美國工業州份欲以德國為榜樣，重建製造業，不斷有美國高官訪問德國抄橋，但原來遇上一個重大難題，就係美國嚴重缺乏技術工人。美國有太多人讀大學，因太多畢業生嘞，結果15%的士司機有學位（1970年時只係1%），售貨員25%有學位（1970年係5%），甚至乎清潔工人（janitor）之中，5%有學士學位，呢班人全部學歷過高（overqualified），而且因為讀完大學孭咗一身學生債，現在低收入，將來唔知點償還。點解唔做製造業工人呢，美國有三百五十萬職位空缺噃，呢樣咪係職位錯配，教育與職業不配合囉。德國西門子在北卡羅萊納州工廠招聘50名工人，有二千人應徵，但只有一成應徵者通過能力傾向測驗（aptitude test），西門子話美國冇學徒制度，好難請到熟練工人！但德國嗰一套，美國及香港好難學，就係在16歲嗰年，德國已將學生分流，有一半中學生要轉讀職業教育做學徒，從此與大學無緣。美國人，香港人，死都唔肯搞呢套嘅啦，香港特區政府其實可以在文憑試之後大力推動職業教育，擴大IVE，鼓勵副學士以兩年職業教育為主，學習一啲德國風啦。