現屆政府施政有一大特色，就係講咗就當做咗，執政政策出台，甩皮甩骨，錯漏百出就當冇件事。市民心水清，梁振英政府民望低殘，到今日已非僭建的誠信問題，而係執政能力低。
房策混亂 恐重蹈八萬五
最新登場係推倒曾朝可租可買的置安心綠悠雅苑項目，變成居屋出售，以為可以用一房細單位作上車盤，討好年輕置業人士。房屋乃梁粉主打項目，又有楊家聲、鄔滿海、陳啟宗一班房策專家助拳，結果大家有目共睹。起初收表時10倍認購，結果揀樓時一半中籤買家冇出現，而大單位就俾公屋綠表住戶買晒，剩低200幾萬細單位畀白表，難怪物業代理界人士認為梁之房策，已重回八萬五政府時，居屋夾屋與私人市場爭利的局面。
佢有冇諗清楚政府點解要做發展商，在青衣建200幾萬上車盤，真係白癡。政策目標不明，胡亂推倒可租可買安排，最終房策肯定變成一片混亂。房策首重長期合理性，而非應付短期民粹要求，一連串短期看似理性決策，最終會變成長期不理性。
目前私人巿場在BSD、SSD打擊下，交投淡靜，而政府則全速搜刮土地建資助房屋，2017年梁任期結束前應已重蹈八萬五覆轍，因私人樓價格大幅回落，置業需求急跌，資助房屋乏人問津。
講咗當做咗的，仲有雷厲風行打擊新界僭建，本來政府已大細超，容許村屋申報免拆，但新界村屋僭建物申報計劃今年1月截止，最新數字顯示，屋宇署共接獲約11,000宗申報，估計佔新界村屋僭建數目的三分之一。林鄭既然咁打得，就要交代其餘三分之二唔肯申報之村屋入村清拆大計，至今總共發出幾多張清拆令，向公眾交代由邊個重災區開始。但睇個勢又將會靜雞雞收工，講咗就當做咗。
至於政改就更衰，連一個準確的諮詢時間表亦欠交代，對比前朝是一大倒退。更令人憂慮係究竟今日，是否仍由梁振英話事。兩會之後成個政府忽然冇影，除必要時事回應外，大家閃得就閃，當外邊有批評，先出來講幾句。
大家都有疑問，今日梁振英政府有應付危機能力嗎？
添馬男