曼聯奪標在望，但聯賽3、4位置就繼續爭崩頭。車路士喺周三英超發威，兩位中堅大衛雷斯同泰利包辦晒3個入球，幫車仔3:0作客大勝富咸重返第3位。雖然隊長泰利梅開二度威到盡，但領隊賓尼迪斯賽後依然冇面畀，話有波入又唔代表一定繼續有正選喎。
雖然賽程頻密，但車路士喺周三場波依然狀態唔錯。作客富咸開賽30分鐘先開紀錄，大衛雷斯離門35碼炮彈式勁射破網。之後到雷斯嘅中堅拍檔發威，泰利先喺完半場前接應傳中頂入，到71分鐘再頂入一球奠定勝局。
林伯600場冇波入
全取3分之後，車路士再次壓住阿仙奴升上第3，之後會喺下周日作客出戰利物浦，呢場硬仗嘅勝負，對車仔拎唔拎到下屆歐聯參賽席位非常重要。對於梅開二度嘅泰利，領隊賓尼迪斯賽後話：「佢喺賽後好開心，其他隊友都一樣。我樂意見到派唔派泰利上陣嘅問題繼續存在，因為我希望每一位球員都可以為隨時獲派上陣做好準備，球季完結之前我哋仲有8、9場比賽要打。」今場亦係老將林柏特第600次代表車路士上陣嘅比賽，可惜入唔到波為自己贈興。
另外，盛傳會喺下季回歸車路士嘅摩連奴，據報真係會喺今季後離開皇馬。摩連奴個仔𠵱家效力緊皇馬梯隊簡尼亞斯，而呢隊波嘅教練艾華利斯就爆料，指摩連奴已經同佢講咗今季之後會走人。另一邊廂就傳車路士亦做咗兩手準備，同馬拉加嘅比歷連尼密斟。後者當年教咗皇馬一季之後被踢走，正正係由摩連奴接任。