購物狂都可以成為一種職業，每月有卡碌、有錢使，還可以像明星一樣擁有粉絲，最重要是不用找卡數，相信不少港女對此夢寐以求。
原來這份工是時裝店買手，每月去日本掃貨，吸引不少後生女加入。
「之前做Sales月入一萬，用七千蚊買衫，人工每月清；𠵱家做日本時裝買手，負責幫公司去日本shopping買衫，簡直滿足晒我嘅購物慾，最鍾意碌爆卡又唔使我找數！」自認購物狂的郭若琳（Little），笑言找到一份絕世好工。
記者：羅鈺歡 攝影：鄧振權
襯衫扮靚 自拍放facebook
她的工作很簡單，每日只需要負責襯衫、扮靚和自拍靚相放上facebook，而且每月有十萬現金供她到日本吃喝玩樂，購買各款最潮靚衫，唔夠錢用還可以隨便碌卡，去到邊度都受盡大客禮遇。
唯一條件是，所買的時裝只是幫公司入貨，她只能享受購物過程。
她叫Little Kaku，是一名日本時裝買手，這是香港最新興的職業。眼大大的她，皮膚白滑，經常將自拍可愛照放上fb分享，造型日日新鮮，所穿的服飾全是日本當季至潮至hot。
「碌爆公司卡滿足感最大」
她自認是超級購物狂，中五畢業後曾做過旺角時裝店售貨員，曾經每日對住新款靚衫難忍手，月花六至七千元買衫，人工月月清，「試過一件衫買晒幾隻顏色，有日搬屋先發現好多衫未着過，有啲連牌都未剪，嗰時開始醒覺，好彩屋企有三個身型相約嘅妹妹，啲衫可以畀晒佢哋」。
兩年前得到現任時裝店老闆娘賞識挖角，她的人生從此改變。老闆娘在fb收訂單，然後安排一班手下輪流去日本買貨，每次準備五至十萬港幣及多張信用卡給她們用，「帶住咁多現金喺身都幾驚，因為人在異地唔知會發生乜事，反而碌爆公司卡滿足感最大」。
她坦言現在薪金約一萬元，其實不算高，但自己現在月花三千元買新衫已經足夠，因為「每日工作都喺買衫同試新衫，最新最潮都有，已經完全滿足咗自己嘅購物慾」。每月下來，Little還能儲蓄，真是意想不到。
扮完豪客 變身做苦力
這份工扮完豪客，還是有其他代價，就是要做苦力搬運貨物，「買衫固然開心，但每次買貨都要人手攞返酒店，一行就四日，打風落雪都照行，有時行到雙腿微絲血管爆裂，返酒店後仲要執貨、保持可愛樣襯衫拍照和即時網上報價，回港後為咗盡快執貨包裝上架，做到凌晨六點都係常事」。記者想起JR上落梯級多，對一個搬住一袋二袋衫、體重只有45公斤的瘦小女仔而言，其實頗辛苦。
雖然去日本開工時可以自行選擇款式，但選擇之多令人花多眼亂，Little有時都會失手，「試過買錯貨、撞色或款式相似而賣唔出，資金壓住，惟有重新演繹配襯嚟吸客。為咗吸引客人訂貨，我會專登用不同嘅電話App，將相片設計得靚靚先放上網」。雖說是滿足購物慾，但一萬元人工要包腳骨力加榨乾腦汁，還要背負銷售壓力，記者不得不佩服老闆娘「好橋」，懂得招聘購物狂，把工作寓於娛樂。
Little Kaku坦承，這份工除了滿足購物慾，也同時滿足表演慾，不少OL客人是她網上粉絲，每日在辦公室電腦前追蹤她最新裝扮，「有時客人會指住我身上所着嘅全套衫買返去㗎」。經她成功打造衣着品味的客人也多達十數位。
這份工讓她踏遍日本東京、原宿、涉谷、新宿、南青山和代官山等主要潮流地方，「𠵱家已經唔期待去日本旅行，只期待佢啲新款靚衫推出」。
目前香港網上時裝店越開越多，像她這種職業女買手也多達幾十個。
點先做到呢份工？樣靚識打扮
Little表示要入行，多數由熟人介紹，而且要有時裝觸覺，「呢份工都唔易做，要有fashion sense、樣要靚、識打扮，着T-shirt牛仔褲、唔識化妝嘅女仔，多數都唔請」。
其中一間時裝店負責人Iris Yeung也指出，入行者必須夠潮，「要做日本時裝買手，首要條件是熟悉日本文化和時裝進程，每次去日本逐件入貨，必須膽大心細眼光準，如果成日驚入錯貨令貨物遲咗返香港，同行搶先推售，咁貨品便會滯銷。此外樣子要受大眾歡迎兼上鏡，服裝先吸引到客人購買，還要識打扮、識拍攝及數口精。加上工時長、貨物重，要好捱得先做到」。