H指繼續收於牛熊線之下，但個別中資股呈強，水泥股龍頭安徽海螺（914）逆市突破50日線，配合水泥需求進入旺季等因素，值得望多兩眼。
內地剛公佈第二季國內生產總值（GDP）增長7.7%，遜預期嘅8%，隨即惹來硬着陸憂慮。但7.7%增長其實仍高於阿爺定下嘅7.5%底線，形勢非外界所言悲觀。為保第二季經濟增長，阿爺料再力谷基建項目，水泥需求有增無減，海螺肯定受惠。證券行德銀早前發表報告，在汰弱留強情況下，海螺有力主導市場價格，生產成本亦較同業低一至兩成；該行又指，海螺擁有強勁現金流，財務狀況遠勝另一龍頭中國建材（3323），故給予買入評級，目標價睇33.70元。另市傳城鎮化工作會議將於本月底舉行，肯定會提出大興土木，屆時海螺又多一個上升催化劑。
海螺噚日收報28元，升2.4%，重越50日線意味扭轉中線弱勢，有力再上一層樓，以預測市盈率16倍作目標，可見33.10元，潛在升幅18%。
唐牛