「Son姐，碼頭工潮已經有廿日，本來我以為SON姐會寫的，但係等咗好耐都唔見，唔知SON姐有乜睇法，所以忍唔住想請教你。我一直好認同自由市場嘅理論，任何人覺得自己應該得到更多，都可以諗辦法去付諸實行、進修、轉工甚至轉行，利用環境轉變去將自己潛在能力釋放出來，市場自然會話你知你值幾多錢。罷工、示威對個人競爭力毫無提升，點可以令到人地畀更多你呢？
第二，佢哋話工作環境惡劣、工時長，但係我睇到嘅訊息，佢哋啲問題好似只係用錢就解決到，唔通多咗錢就可以優化工作環境、可以得到更多嘅休息時間？所以，唔計政治層面，今次雙李對決，我唔會支持工人，因為我覺得各有前因莫羨人，我的諗法正確嗎？
最後，我覺得香港只會越來越亂，SON姐覺得呢？」
我的睇法和你的相近。其實工潮爆發沒多久有好幾位讀者來過電郵問我點睇，可惜這個工潮一開始經已「被騎劫」，只得「敵、我」兩路，工人們包括香港人的仇富反抗情緒被挑撥到如此高漲，偉大工人領袖日日高舉旗幟高喊口號帶領群眾去打仗的時候，還容得下其他聲音嗎？
究竟大家有沒有真正關心過工人的利益及前途？站出來義正詞嚴個個化身正義超人撐工人罷工講得真口響，講到底這些不是高技能的工作，無了期地拖下去工作一旦被取代了，日後生計怎算？眼看工人們「被抽水」被推上非常危險的境地，我內心很是焦急。工人當然有權爭取加薪、福利及改善工作環境，但死抱「我要贏，你就要輸」的態度是談判大忌，根本沒可能解決問題，只會令矛盾積怨加深無法化解，結果只能是通輸。
張慧敏
http://www.facebook.com/HKcareerdoctor