金牌監製李添勝操刀嘅無綫劇《神探高倫布》，唔經唔覺都播咗三分一，唔少網民大彈套劇沉悶兼重口味，但正如添哥話齋，劇情會越嚟越好睇。下個禮拜劇情講到中咗槍嘅黎耀祥醒番，不過佢已經唔記得咗高倫布嘅身份，變番戇直嘅高大喜，仲忘記咗馬賽。但係馬賽唔單止冇放棄呢段感情，仲搬埋去祥仔屋企一齊住，照顧起居飲食又幫佢沖涼，貴為視帝嘅祥仔仲慷慨露兩點㖭。
而注射咗高倫布腦細胞嘅敖嘉年亦醒番，不過變咗另一個高智商、冷酷無情嘅高倫布，經常欺壓祥仔，仲威逼祥仔喺屎坑幫佢執戒指，見祥仔搞到周身屎，認真重口味。唐詩詠則繼續同馬賽鬥過你死我活，仲捲入咗一宗謀殺案，馬賽追查之下發現一個重大秘密。
自薦拍AV
另外，好多人話睇唔明《神》劇，噚日一班演員喺觀塘出席宣傳嗰陣，祥仔話：「成日話我哋冇新意，啲劇橋段太簡單同老套，複雜少少又話唔明，做演員同電視都好難做，捉曱甴又話我AV眼，咁講我咪可以拍AV去日本進軍藝能界，拍套鹹濕捉曱甴。」
版主：陳基征
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/