英超今周中加開快車，周二就踢咗場前4爭奪戰，主場出擊嘅阿仙奴，同愛華頓互有攻守下，賽和0:0，表面睇好似悶波一場，但其實兩隊都有好多入波機會；半場更加出現「火上加油」場面，愛華頓中場米拿拉斯向阿仙奴中場韋舒亞「射水」，搞到場波氣氛更加熾熱。
阿愛戰窿對窿
賽前兩軍分別列第3及第6，大家踢得幾積極，成場波都算多埋門；客軍中場派拿6分鐘單刀，乘主隊門將施捷斯尼出迎前起腳，但一飛沖天；阿仙奴前鋒基奧特就未能延續上仗入球威脅，上、下半場各有近門機會，包括42分鐘接應辛迪卡索拉傳中撞射，可惜斜出。愛華頓今仗起用新人羅斯巴克利打正選中場，都幾搶眼，65分鐘禁區頂妙射僅斜出，結果兩軍合共23次射門，都換唔到入球，各得1分，對爭前4好過冇啦。
比賽冇入波，兩軍就加番啲辣味刺激吓捱更抵夜嘅觀眾；喺半場休息，球員行返入更衣室期間，手持水樽嘅米拿拉斯一時貪玩，向韋舒亞射水；韋舒亞即時火起，立即向米拿拉斯叉頸，好彩雙方隊友及時當「和事老」勸開兩人，先避免更多衡突。
對於阿仙奴𠵱家33戰得60分仍排第3位（未計周三戰果），領隊雲格話：「我哋仲處於有利位置，但最重要下仗要贏番波，只要我哋保持戰績，就有信心取得歐聯資格。」愛華頓就33戰得56分排第6，領隊莫耶斯認為餘下5場聯賽必須全勝，先有歐聯希望。英國博彩公司珊瑚開出英超前4賠率，阿仙奴由1.3倍回冷至1.44倍，愛華頓更屬13倍冷門，睇嚟「拖肥糖」要踢歐聯有啲難度。