九龍站君臨天下雙屍命案轟動一時，賭王四太梁安琪係出事單位業主，豪宅無端端淪為凶宅，都咪話唔黑仔，好在四太手頭嘅物業遍佈港九，一件貨出事應該無損四太心情。
赤柱兩屋 呎租48蚊
舉例，四太揸住赤柱東頭灣道Fairwinds，係傳統高尚海景豪宅區，最近就連環租出兩間大屋，每幢3,500方呎，實用面積2,685呎，月租17萬元，建築呎租48蚊。
四太喺07年5月分別用7,500萬同6,500萬元買入呢兩間雙號屋，以最新租金計算，回報分別有2.7厘同3.1厘，以𠵱家市道來講算唔錯。
咁都唔止，聽聞四太喺南灣道華景園有個1座中層B單位，建築面積3,061呎，實用2,491呎，最近有租客肯每月10萬承租，呎租33蚊，回報5厘。四太連環租出咁多豪宅，應該撥開雲霧笑番啦！