小G在復活節假期本想去日本，但因為爸爸踢足球時突然間在球場跪低唔郁得，送入急症室，於是臨時取消假期，佢爸爸經歷咗驚險十小時，過程不便詳細講咯，總之吉人天相，東區醫院醫生施手術搶救後，住咗十天，已經冇事，返咗屋企休養，一切健康正常。小G話經此一役，先知道香港公立醫院夠先進，醫生好，護士好，第一次覺得一家人常常交稅，交得好抵，因為手術費住院費只係收一千元，心臟支架就另外向供應商付款。
平時有不少朋友駡公立醫院，有親病都要入私立醫院，朋友之朋友之朋友嘅太太係公務員，入公立醫院有好多津貼，居然亦不要，凡事到私家醫生，私立醫院，話安心好多喎，幾令人不解。左丁山對小G謂：「你爸爸當日如果入私立醫院，大概冇二三十萬元出唔返嚟。」小G話：「係呀，我地成家人都好感激東區醫院！」
復活節唔放假，五月補番，去邊度呢？當然又係日本啦，小G旅行次數好多，不過次次都係去日本，百去不厭，連曼谷都未踏足過，總之放假冇日本不歡。之前日圓對港元係一比十，𠵱家一比八，着數好多，梗係要去啦，掃平貨吖嗎，外滙C聽到，叫佢不妨周圍睇屋，探吓房屋市場，在東京、大阪、京都等地買番一層樓仲好。𠵱家香港人興去倫敦買樓噃，不久前倫敦有一個住宅樓盤在文華東方酒店展銷，位置喺Notting Hill（其實係再行遠啲），有賴茱莉亞羅拔絲與曉格嗰套戲嘅Notting Hill效應，十分暢銷。左丁山一位朋友與老婆在中環飲下午茶，拍拖上文華睇吓，居然即場買咗一間一房單位，香港既有此潮流，何解要到日本買樓噃？外滙C向左丁山解釋：「有兩點，一，日圓不斷貶值，而日本房產價格未升，即係日本房屋價格（以港元計）下跌咗不少，二，日本利率低到零，借日圓按揭買日本資產嘅財務成本好少，諗得過㗎。以前我地冇資格在六本木買樓，𠵱家或者買得到咯喎！」左丁山話：「如果中日打仗咪死？」外滙C講：「唔會嘅，金正恩都未駛驚，駛乜驚釣魚台引起戰爭！」唔，香港啲有錢人士，唔知會唔會諗一諗呢？梁振英係要搞到本港樓市如一潭死水，𠵱家東京、京都似乎幾啱睇噃。