禽流感疫情上星期衝出華東，殺入北京，當地首宗確診嘅七歲女童姚圓圓，成為全國焦點。染疫嘅圓圓曾經發高燒兼咳嗽，而由地壇醫院安排佢首次露面，到噚日高調出院，八方都留意到圓圓每日都有得玩唔同嘅公仔。好似4月15日圓圓由ICU轉去普通病房，佢手就攞住隻Melody兔，陪同嘅護士就幫佢揸住隻國產卡通片《喜羊羊與灰太狼》入面嘅「紅太狼」公仔；到咗噚日圓圓出院，佢媽媽就幫佢拎住隻美羊羊公仔。
院方喺官方微博解釋，圓圓因為突然入院，屋企人趕唔切幫佢預備玩具，護士決定將自己嘅公仔轉贈；而有心人送畀佢嘅公仔，更可能多到可以擺滿成個衣櫃。內地傳媒近日都有報道圓圓喺病房嘅一舉一動，每次見報，圓圓唔單止可以為強國嘅醫術大賣廣告，佢攬過嘅公仔亦成功曝光，唔知會唔會好似強國第一夫人彭麗媛外訪時所着嘅服裝品牌咁，又掀起搶購熱潮呢？