佔領中環，全港家庭都有參與的可能，家長疑問重重，拋磚引玉，現在先提出來參詳：
一，兩公婆拍住上佔領中環，獨留精叻兒童在家，阿仔有無權保釋阿爸阿媽？
二，當正佔領中環是復活節假期坐機鐵，兩大人出行，同行小童免費。請問佔中有無預計開辦中環學堂，連小學雞都可以放心留守，遊學中環，不怕荒廢學業。
三，預早查詢保險公司，一家大細佔領中環，屬於高風險活動嗎？到樂蜀玩熱氣球與佔中相比，哪項更高危？
四，阿仔計劃約埋成班同學仔佔中，本地兒童監倉有位嗎？有得揀兒童監獄餐嗎？
五，佔領中環多久，才能提出逆權侵佔？做家長的，邊個唔想幫子女霸定靚位？
六，警隊新訂購的大支裝胡椒噴霧，會對付小童嗎？
七，經濟佬斷言佔中一日已令香港損失16億，我計唔掂條數，斷估是指警方暴力清場，拆散無數家庭，供養一個孩子要四百萬嘛。假如一萬個家長被拉，多少孩子「斷供」？何止16億！