最近阿媽問得海迪最多的，唔係「食咗飯未」、「飲唔飲湯」，而係「金價係咪跌咗好多？」、「買得未呀？」，諸如此類。金價單日一跌，竟然可跌成100蚊美元，波動情況猶如街市買菜，不少本地珠寶老行尊都話，起碼有廿年冇見過全城搶金呢個盛況，他們的分店已全面取消休假，經理連食飯都冇時間。聞說個別地舖，多人到要排隊入內，非常誇張。
雖然呢啲係happy problem，不過業內人士對於全城瘋狂搶金，心底裏有點不以為然。金價近年長期向上，似乎令大家忘記咗，在九十年代，黃金都經歷過10年非常牛皮的日子，那時黃金需求相對疲弱，反而其他珠寶仲好賣。所謂「買黃金保值」，係建基於你覺得金價會穩健地上升嘅基礎上，如果金價步入熊市，人嘅預期一旦逆轉，呢種保值需求根本企唔住腳。
所以業內人士都話，呢轉小陽春，只係等大家搵一轉快錢，並不等於前景秀麗。更令人擔心的是，除了那些「周字頭」、「六字輩」的連鎖店外，近年那些多如雨後春筍的小珠寶金行，冇乜做黃金對沖，過去幾年是靠金價不斷攀升，就算冇生意，齋坐貨都賺錢。如果金價繼續尋底，呢啲小舖頭嚟緊仲點捱得住？
海迪