【本報訊】本周二《爽報》報道，真鐸學校有教師對弱聽女生揭裙非禮並強迫食死蚊，報道刊出後，本報收到多名真鐸家長求助，指校方強迫他們聯署抵制《爽報》及歌頌學校。
一名家長投訴：「真鐸學校要我哋家長聯合簽署，反你哋報章，同埋出咗一張通告，要我哋家長感激學校。」通告寫道：「我們在此盡心感激學校對子女們的關愛與栽培，並繼續全力支持學校。」通知下款署名為「一群愛護學校的家長」。通告沒有透露，家長如不簽署將面對甚麼後果，但該名家長明言拒簽，「我哋簽唔落手囉，冇理由逼我哋咁樣簽囉！」
家長：形同精神折磨
此外不斷有家長來電，指報道刊出當日，校長曾傳召幾名學生，一名家長透露：「今日（4月16日）真鐸學校喺朝早11點幾捉咗幾個學生入校長室，到5點都唔畀放學。唔該你哋跟進吓，一係就（由始至終）唔好跟進！」另一名有份「變相留堂」的學生，其家長直言校方此舉形同精神折磨，「我哋就嚟個個都畀佢哋搞到精神病！」
真鐸學校發言人回覆本報，否認以上指控，並強調一向以關心學生為宗旨。