塗鴉竟然要出動重案組調查？咪以為咁誇張，肯定係《寒戰》續集劇情，真人真事嚟㗎！話說馬鞍山錦豐苑錦葵閣，先後三度出現「習近平XX」五個字塗鴉。嘩！習總被連環「X」喎，簡直係煽動顛覆國家政權啦，難怪警方高度重視，交由重案組接手調查呢個「X」檔案！
話說今個月7號，錦葵閣保安員喺四樓後樓梯，發現有人喺紙皮石牆上用原子筆寫住「習近平XX」，涉及領導，保安梗係即刻報警，沙田警方當時將呢單嘢列作刑事毀壞案，由CID跟進。點知前日，保安員又喺五樓後樓梯間牆上發現呢幾粒字，再報警；最挑機嘅係，保安噚日又喺八至九樓梯間，發現「習近平XX」。警方方知大事不妙，噚日將事件「升呢」交由沙田警區重案組調查。
曾緝捕聲援艾未未少女
如果牆上寫住嘅係「李八方XX」，相信警方肯定唔會出動重案組；但習近平喎，國家主席兼總書記喎，竟然喺香港被「X」？相信一哥禿鷹都覺得冇晒「飛士」。若然唔高調派重案去查，八方相信佢哋好可能會畀「XX」就真嘞。其實警方喺2011年，都出動過重案緝捕聲援艾未未嘅塗鴉少女，疑藉此向阿爺「邀功」。
錦葵閣街坊話，唔覺得區內其他地方有呢類塗鴉，反而見到好多街童喺牆上寫啲情情愛愛嘅肉麻嘢。莫非呢個「XX」都係習總粉絲們愛在心裏口難開嘅「密碼」，「XX」可能係「帥哥」、「型男」甚至「BB」都未定喎。
mailto:[email protected]