周大師說中港股市都是政策市，魏力十分同意，政策市估值要大打折扣，加上阿爺收緊銀根，故跑輸歐美日股市是理所當然。外資行近日猛話中港股市抵買，港股得10倍PE，A股更是單位數，但點解佢哋唔掃貨？點解個市仲係一浪低於一浪？避開呢類大行噪音，用常理推測就會明白，強國正面對結構性增長放緩、人口老化的壓力浮現，資金才會大舉流往歐美日市場。
話雖如此，政策市都有得炒，就係集中炒幾個有國策支撐的強勢板塊，例如醫藥、燃氣、家電、環保之類，都具城鎮化及「美麗中國」等概念，大勢顯然向上。另外，智能手機相關股如舜宇光學（2382）、金山軟件（3888）等，相信仍有好幾年可炒，是趁低吸納之選。
近排環保股中，以京能（579）及華電福新（816）最強，主要係落後得太多，但要選最穩健、最具盈利基礎的環保股，非光大國際（257）莫屬。集團是行內先軀，兼具垃圾發電、污水處理及新能源發電業務，過去五年盈利年年增長，純利累升2.3倍，去年勁賺11.23億銀，按年飆40%；毛利率高達49.4%，增加8.2個百分點。彭博今年預測PE為19倍，明年為16倍，較過去五年平均27倍PE折讓三成，值得中線持有。
魏力
http://www.facebook.com/2012jason
本欄逢周一、二、四、五刊出