【銅鑼灣】對外籍人士情有獨鍾嘅鄭欣宜，之前同老外男友Mark Ryan嘅五年情玩完後，冇幾耐又同嚟港發展嘅韓籍巨胸男模崔豪晉（Jin）極速發展，兩人經常約會，不過欣宜死口唔認戀情。前晚欣宜又同Jin喺銅鑼灣撐枱腳，但最後似乎不歡而散，原來係吸煙累事！
事緣前晚8點45分，韓模大隻Jin喺金百利商場門口同揸住支啤酒嘅外籍男仔傾偈，之後啤酒男離開，Jin一個人去咗商場嘅韓國燒烤店攞位，唔夠十分鐘，打扮別出心裁兼戴帽嘅欣宜嚟到，欣宜一坐低就滔滔不絕，仲攞部手機畀相Jin睇，氣氛溫馨甜蜜。
獨自打的離開
到夜晚11點，大隻Jin個啤酒男友人加入，佢哋食到約11點45分埋單離開。雖然大隻Jin同欣宜同行，但一落到樓Jin已經急不及待點煙，嗰位啤酒男即時加入吸煙聯盟，搞到唔食煙嘅欣宜即時彈開，等咗一陣見男友唔理自己，欣宜表面笑笑口咁揮手轉身，但睇得出佢內心團火應該好猛！Jin仲未知死，離遠跟喺女友後面，依然同個啤酒男談笑風生。行到去世貿中心嘅時候，欣宜終於爆發，二話不說自己跳上的士走咗，跟喺後面嘅兩男仲未知發生乜事，只有呆企喺的士站！
採訪、攝影：梁繼光、彭琮然
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/