上市公司搞關連交易，部份係公司向大股東買資產，大到一盤生意又有，細到一件藝術品都有，好似中國水業（1129）咁，拎110萬（人仔．下同）向主席老婆買架七人車就比較少見。
中國水業噚日出通告，向主席兼行政總裁王德銀太太陳卓湘買入一架豐田七人車，用作日常用途，仲好認真咁做咗個估值，指架車值115.6萬，換言之，公司用110萬買入係抵嘅。
死撐購入合理
之不過，俗語有云：新車落地唔見一半，公司呢個估值究竟點計呢？
公司解釋，架車已經由管理層用於往返中港兩地，買入屬於合理。王太唔係中國水業董事，亦冇披露喺公司有冇職務。令人費解嘅係，市場上有咁多車，點解一定要買王太呢架呢？唔通呢架好坐啲、還是王太想換車？