食飯食出火!港交所(388)行政總裁李小加同九大證券組織嘅會長噚日約埋一齊食晏,大家原本冇乜期望,估計都係吹完水就散水,點知席間竟然上演咗一場幾有火花嘅好戲,姑且將套戲叫做《串嘴小加鬥華峰》先。
搵錢撻人搞出事
話說九大證券組織會長同李小加準時一點喺中環利苑食晏,一開頭大家都言談甚歡,有講有笑,但係當立法會金融服務界議員張華峰開始入正題,要求李小加多加照顧本地中小券商,例如減報價機收費,等佢哋生意易撈啲,咁就出事。李小加以前多數應咗就算,點知幾位座上客憶述,小加今次串嘴兼豪氣咁拋下一句:錢解決到嘅問題,畀晒你囉!
港交所舊年來自網絡及終端機用戶收費、數據專線及軟件分判牌照費嘅收入係3.34億元,只佔總收入4.6%,李小加可能覺得呢筆收入濕濕碎,加上早前斥資過百億買入倫敦金屬交易所,錢途無限,豪畀你又點話。
唔妥偏幫外資行
張華峰聽到李小加用錢撻佢,已經唔高興,對方仲要加多句你代表四百幾個經紀,咁小圈子,即時辣㷫張議員,雙方繼而針鋒相對,嗌到面紅耳熱,成枱人唔敢出聲,睇佢哋嗌交,大致係李小加話已經做好呢份工,張議員就認為佢偏幫外資券商,嗌足廿分鐘先收聲。
立法會金融服務界前議員詹培忠就話外號「潮州怒漢」啫,估唔到張議員都唔係省油燈。佢事後回應,指李小加好執着,原本諗住呢餐飯可以拉近距離,點知越拉越遠。
李華華
mailto:[email protected]