搶樓、搶奶粉、搶尿片，凡係香港品質保證比強國好嘅產品，強國人都會南下搶貨。金價暴跌，旋即觸發香港人、強國人逼爆金舖。
話說好姊妹Ana就快結婚，眼見金價喪跌，唔執輸去新界北金舖買嫁妝。點知去到周生生（116），職員話所有龍鳳鐲已沽清；周大福（1929）呢？由於有自由行，加上香港人硬闖，人多到根本逼唔入，最後去到六福（590）先可以企定揀嫁妝。
Ana以OL觀人於微嘅洞察力，發現場內超過一半都係強國人，佢哋仲要一盤一盤金飾咁掃。職員同Ana吹水時講到，入行七年，未試過忙到連晏都食唔到。到準備打烊時，有幾個強國人企圖衝入，職員即以九秒九極速上前截住。有生意都唔做，可想而知佢哋真係攰到冇晒力。
有人話，金舖咁好生意，可能抵銷到金價下跌嘅影響。咁又未必，訂製飾金一般都要一個月，𠵱家中港聯手掃金，市面有買冇沽。金舖唔夠貨？或者佢哋要請個鍊金術師至得啦。
Fifi
本欄逢周二、四刊出