「利世民最中肯！」先旨聲明，講呢句話，就算唔係出於真心，都出於事實。以前，見好多財演行家，冇話邊個最中肯，個個做得呢行，兼捱得住，都應該有自己一套覺得中肯嘅睇法。
不過，噚日利世民就憑佢嗰篇題為「孫柏文最靚仔」一文，即成孫柏文心中最中肯兼最準之財經演員，今年不得不提名佢做財經影帝！
講起利世民，佢亦喺兩日前寫咗篇題為「金價暴瀉的陰謀」嘅文，信聯儲局想打壓金價去做個美元強勢假象嘅人係信錯。
𠵱家實情係金銀，到上個禮拜尾，已經跌穿由2011年QE2後嘅多年支持位。咁有好多借錢去買金銀嘅人，喺嗰啲支持位下面定拋售嘅止蝕位。所以一穿支持位，觸發止蝕盤，就雪崩咁跌。
如果唔要陰謀論，就不如根據弗利民。佢話，印咗嘅鈔乘錢嘅流動速度，就等於物品數目乘價錢，即MV=PQ。現金數量不變，價錢跌，不過印咗嘅鈔票數量不斷增加，就等於錢嘅流通速度將會大幅下跌。
量寬料將加碼
而令錢嘅流通速度急速下跌，理由可以係經濟差，冇人借錢，甚至係銀行系統將會出事，周街擠提。點都好，因為怕通縮，令債務負擔增加，央行們見錢嘅流動減慢時，就加印，所以如無意外，現無限期量寬額將會加碼。金、銀將會受惠。
我亦現呼籲，特區係時候將外滙儲備盈餘買金銀了。
最後，想先賣個小廣告。下個禮拜四晚，孫柏文、李兆富、王弼，會繼上兩個月咁，幫獅子山學會做個seminar，就快爆滿，淨名額80個，收費50蚊。會講「戴卓爾和她生命中的三個男人」，Google個題就搵到，嗰日會有唔少問答時間。都係嗰句，相信冇乜50蚊嘅活動，可令大家唔覺得自己嘥咗兩個鐘頭嘅生命。
孫柏文
獨立股評人
http://facebook.com/shuen
本欄逢周二、四刊出