三位〈300萬爽組合〉參賽者不約而同掃入玩具股威發（765），該股以高息招徠，與唐牛早前推介嘅鬆弛熊生產商德林（1126）同樣抵博，後者噚日破旗而上，大升後市盈率仲未夠7倍，息率逾6厘，市值僅8億銀，可塑性絕不遜於威發。
工業股大旺，新能源股亦百花齊放，風電股華能新能源（958）一度創2.54元上市新高，埋單升4.2%，報2.48元，逼近招股價水平，盈利前景及技術走勢俱向好，值得望多兩眼。華能新能源首季發電量大升64.8%，較花旗預測升50%更勁，各區風電場全線有增長，反映一直拖住風電股後腿嘅棄電問題得到解決，今年盈利隨時升到你唔信。彭博綜合券商預測，今年預測市盈率16倍，意味盈利增長以倍計。噚日成交較公佈首季發電量當日更大，證明基金追貨活動有增無減，歐洲股神主理嘅富達，最近持股量增至9.1%，可謂信心十足。集團上市後表現未好過，難得炒turnaround兼重返家鄉，坐貨者大有機會本利歸還。
唐牛