無綫劇集《仁心解碼II》今個禮拜大結局，收視亦衝破30點大關，噚日成班演員除咗蒙嘉慧同拍緊劇陳茵媺之外，所有演員都到齊撐場，仲重演部份劇情。蕭正楠喺套劇做哨牙仔彈出，佢即場同苟芸慧重演唧榮被踢爆劈腿嗰場戲，苟姑娘就一巴掌摑埋去蕭正楠度，啪一聲，塊面成個掌印，現場嘅人都嚇到嘩嘩聲，企喺度硬食嘅蕭正楠就「𠽌𠽌」聲捽面。
投訴見怪不怪
事後苟姑娘話：「我已經留力，咁係想逼真，所以真打囉！乜我好大力咩？」唔知會以為打得咁狠嘅苟姑娘曾經俾仔飛，佢話：「唔係，就係未試過先要試吓，咁先夠認真！」俾人打咗一巴嘅蕭正楠亦忍唔住話：「咁同你拍kiss戲都幾好，你一定好肉緊，可以同你法式濕吻。」
《仁心解碼II》試過一日收到三十幾宗投訴，方中信見怪不怪，佢話：「預咗喇！少喇已經，拍嗰時已經知道好多都好踩界。」劇入面借精畀蒙嘉慧嘅方中信，現場飲雞精補身，佢話：「我哋冇咗鄭太（蒙嘉慧），之後鄭太要靠鄭生。」方中信話自己唔會再生，囡囡亦冇要求要細佬妹。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/