前日係希斯布祿球場慘劇24周年，呢一日，利物浦同同市宿敵愛華頓化敵為友，齊齊出席喺晏菲路球場舉行嘅悼念活動，哀悼96名死者。
喺1989年4月15號，利物浦同諾定咸森林喺錫周三嘅希斯布祿球場爭入當屆英足盃決賽；點知發生人踩人意外，導致96人死亡、766人受傷。之前紅軍球迷一直被指係罪魁禍首，但政府做咗獨立調查，仲喺舊年公開報告，指係球場管理不善，加上警方辦事不力，先會釀成慘劇；終於還利物浦球迷清白。
眾星雲集晏菲路
前日，係希斯布祿球場慘劇嘅24周年紀念，除咗利物浦班主約翰亨利同埋韋拿、領隊、球員、基瑾同杜格利殊等名宿之外，愛華頓亦有代表出席呢個喺晏菲路球場舉行嘅悼念活動。現年67歲嘅愛華頓主席簡韋特仲負責致辭：「24年前我以球迷身份喺維拉公園睇波（愛華頓贏諾域治1:0嘅英足盃4強戰），當時我同班朋友收到呢個消息後都非常震驚。如果當日嘅4強抽籤結果係唔同，慘劇就會發生喺我哋身上。我希望喺下年嘅25周年紀念日，你哋可以慶祝正義得到彰顯。」
而約翰亨利就話：「喺24年前離開嘅人，永遠係利物浦嘅一分子。」至於希斯布祿家屬支援小組發言人艾絲賓安話：「我哋喺悼念96名死者嘅同時，亦慶祝喺9月12號搵到真相。我哋用咗8,051日同埋395頁，話畀世人知我哋由第1日就知嘅真相。球迷唔係罪魁禍首。」
大會喺英國時間前日下午3點零6分安排咗1分鐘嘅默哀儀式，之後用咗9分鐘逐一讀出96名死者嘅名字，再將96個紅色氣球放上天空，以祭佢哋在天之靈。