早前亞視歲月留聲台播番89年嘅《吳耀漢攪攪震》，因為整蠱人效果好好笑，又掀起網民一番討論，原來無綫都翻炒呢條舊橋，仲搵咗扮嘢王李思捷擔大旗做新節目《玩嘢王》，節目將會喺大後日（20號）起逢周六播。因為想整蠱人效果好，所以拍攝內容、時間都好保密，拍好晒先播出街。問到節目內容？李思捷都話唔好意思：「真係唔方便透露！」繼續賣關子。
據知，最近憑《神探高倫布》「金伊娃」一角獲封BB嘅馬賽，就係其中一集嘅被整蠱對象，佢之前俾人呃咗，以為自己獲邀去做J2台嘅《兄弟幫》節目嘉賓，同梁烈唯等主持人探討靈異事件，就喺錄影其間發生咗啲靈異怪事喺佢身上，馬賽嚇到半死時先知俾人整蠱！噚日馬賽喺電話度話當時遇到啲靈異嘢真係好驚，反而知道俾人整蠱仲安樂：「出嚟效果好好笑，觀眾唔好錯過。」
俾蕭正楠揼心口
俾人整蠱開似乎有條路，馬賽前晚喺《神》劇俾蕭正楠猛揼心口，劇情講佢去查高倫布嘅底細，點知遇到偷渡客，仲俾人揑到窒息，好彩蕭正楠趕到，見馬賽不省人事即刻解開佢衫鈕，再大力揼佢心口，又大巴摑佢兼人工呼吸，見蕭正楠咁用力揼，都咪話唔係整蠱！
版主：陳基征
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/