近年邊行最缺人？飲食業實佔一席位，講得出名的連鎖食肆，日日登報請人，相熟外賣姐仔近排唔do返去湊仔，講句「有雙手唔怕冇工做」，就輕輕的走了，名副其實打緊一份Samantha都未打過的風流工。食肆小南國（3666）唔知係咪見流失率太勁，向員工派300萬股認購權，歸屬期4年，行使價1.30元。
強國限制公款消費，加上經濟麻麻，搞到小南國舊年人均消費金額僅得220至230人仔，同店銷售減5.4%，下半年跌幅更達7%，今次派認股權時機唔多啱，受到金價大跌和H7N9等困擾，環球百病纏身，噚日更跌穿咗行使價。
翻查資料發現，大家樂（341）1999年面對極大經營壓力時，曾向前線員工派發認股權挽留人才，話說當年認股權個行使價在2.90蚊左右，噚日收市報24蚊，翻了幾廿個筋斗，如果成為第二個大家樂固然值得高興，只怕主僕關係已變質，期權呢條橋out咗，家陣員工打份工，只求「速食」，未必肯同公司捱過世。
Samantha
本欄逢周三、五刊出