【尖沙嘴】現年50歲嘅羅嘉良已經幫太太蘇岩安排好遲啲入院剖腹產女，仲有十幾日就再做老竇嘅嘉良，同老婆行一次街居然食咗至少四次煙，就算大嘅唔怕對BB都唔係幾好，嘉良不如聽香港政府話戒煙啦。
前日下晝3點幾嘉良同老婆去到自由行集中地嘅尖沙嘴海港城作最後衝刺購物。留晒鬚嘅嘉良戴住帽同墨鏡加埋一條短褲露出佢對光管腳同紋身，十足十成個自由行打扮，而太太嘅打扮都好配合老公，兩公婆每間店舖都好認真咁睇，特別係對化妝品、護膚用品同女裝飾物睇得最耐，佢哋仲將買咗嘅戰利品放咗喺嘉良隨身嘅背囊度，不過一向大煙癮嘅嘉良行咗個幾鐘之後，已經急不及待去咗吸煙區食煙，老婆仲企喺佢身邊食二手煙。
連扯四支煙
此外，羅嘉良食完煙兩公婆去咗飲下午茶，然後離開商場，出到廣東道嘉良又點煙，意猶未盡嘅佢哋再去咗連卡佛行咗45分鐘，跟住佢哋沿路行嘅時候，嘉良又食咗支煙，到行到去坐穿梭巴士返屋企嗰陣，嘉良先送老婆上車，自己又去咗食煙，計計埋埋先後食咗四支，佢老婆都聞埋唔少。
嘉良噚日接受商台錄音訪問，佢話：「個仔好乖，我哋成日有講電話，關係好親密，佢知妹妹就嚟出世都好開心。」
採訪、攝影：吳耀輝、李志明
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/