終審法院前常任法官包致金退休後，即敢言發表「法治現烏雲」論，暗指香港的獨立司法制度好有可能受到衝擊，得到唔少港人讚賞；而佢中學嘅母校英皇佐治五世學校（King George Ⅴ School，簡稱KGⅤ），亦好欣賞呢位校友，本周五向佢頒發第三屆「傑出校友大獎」，表揚佢多年來對香港嘅貢獻。
中學時原本喺聖芳濟書院就讀嘅包致金，曾經講過因為好想修讀法律，所以中途轉學到KGⅤ，令佢有機會考取綜合中等教育證書（GCSE），從而到英國修讀法律。包致金母校就預告，包官本周五攞獎時，相信有唔少KGⅤ時代嘅往事可以同大家分享。