一提起佐敦新兜記，好多人最記得燒到脆一脆嘅乳豬；好在新兜記結業後，舊夥計喺銅鑼灣新斗記繼續營業，等大家仲可以時不時嘆吓脆脆乳豬。
向來要保持至fit身形嘅新民黨主席葉劉淑儀都係「豬迷」，據知有朋友帶過佢去新兜記食乳豬後，一試難忘，食幾多都唔厭；上星期五新民黨分享會後，佢就撩黨友一齊食豬，結果有近10個黨友響應，乳豬自然唔少得，佢哋同時點埋豉油皇中蝦同蟶子，以及豬潤浸枸杞等名菜，食到大家「lam lam脷」。
葉劉笑稱最怕自己有嚿豬腩肉，但乳豬當前都忍唔住起勢食咗好多嚿，食完先再減。最終埋單盛惠3,500蚊，圍起都係300零蚊位，請客嘅葉太話幾抵食，黨友以後不妨再向佢提供會後開餐好去處。