自上次城大搗亂事件，陳淨心成功出位，跳上枱面手指指，一副小闖將紅衞兵模樣，另外愛港之聲高達斌、陳廣文等紅色闖將也頻頻接受訪問，形勢一片大好。
香港主流對呢班愛字堆小頭目冇乜認識，走政治beat記者對佢哋背景更一無所知。以往民建聯、工聯及地區左派團體如觀塘民聯，全部打正旗號，六、七十年代已經搞地區，八十年代參與過區議會選舉，政治系譜有迹可尋。𠵱家愛字堆闖將好似石頭爆出來，大家隱約感到唔妥，無端出現一批激進紅色群眾，背後究竟係乜嘢把戲？
點佢哋相唔難，但冇乜用，因為只係一班小闖將，幕後策劃、鼓勵佢哋出位嘅屬乜嘢系統先重要。
從過去挺梁遊行中，「臭格二百五」招募職業梁粉，同新界總商會有關連；另一個專打法輪功的香港青年關愛協會，會長亦係新界總商會董事；愛港之聲高達斌乃經田北辰介紹加入新民黨，田二少本人也是新界總商會顧問；而陳淨心亦傳她曾任新界青年聯會梁錦培助手。
新界有幾個組織同中聯辦關係相當密切，除新界總商會外，仲有新界青年聯會、新界社團聯會、新界潮人總會，就算回歸前，新界地區鄉紳已一直與中方關係十分密切。而梁振英亦係得到新界系統支持，突擊成功，奪取特首寶座。
林鄭打擊僭建冇晒影
今年幾場春節show可見新界系統政治地位正在冒升，舊年新界總商會7月就職禮，由剛當選之梁振英出席致辭，今年新春七大新界社團團拜，由張曉明率領其他中聯辦部長去做團拜。
3月新界總商會團拜，有商界人士去捧場，去到美麗華酒店門口，見到一串政府AM車，嚇咗一跳，去到酒會，見到政務司司長林鄭月娥、中聯辦副主任林武、商務及經濟發展局局長蘇錦樑、教育局局長吳克儉、發展局局長陳茂波、立法會主席曾鈺成，仲有一班廣東省市統戰部官員。對比昔日曾蔭權年代，梁振英更睇重新界力量，這亦解釋了何以「好打得」之林鄭月娥，在前朝高調宣傳打擊新界僭建後，大半年下來，忽然啞火，無聲無息草草收場。
新界鄉紳政治，古靈精怪，乜嘢背景人士都有，過往港英年代政治上亦與鄉紳組成聯盟，但策略上將鄉紳與左派分而治之，並分清莊閒，以政務專員、警區指揮官為主。
時移世易，鄉左合流，政府官員反過來討好鄉紳，新界政治操作方式伸入本地政治主流，後果堪虞！
添馬男