國學大師饒宗頤過去10年，將自己嘅書、畫、文玩捐畀港大，令2003年成立嘅港大饒宗頤學術館，累積藏書達到逾4萬冊。適逢港大饒宗頤學術館成立10周年，港大為答謝饒宗頤多年嚟慷慨捐贈，挑選咗110件具代表性嘅作品，今日起放喺港大美術館展出至6月23日，免費開放畀市民參觀。
展覽分三部份，包括饒公嘅畫作、書法同書籍。書籍部份包括饒宗頤編纂嘅典籍、佢自己嘅珍藏如明清年代印製嘅木板書，以及世界唔同地方著名漢學家送畀饒公嘅書。位於展館最正中嘅薄扶林山水畫，可謂成個館嘅焦點，因為呢幅畫係饒公坐喺港大饒宗頤學術館，望向薄扶林山林時所繪畫，係饒公2008年嘅作品。
今年96歲嘅饒宗頤噚日為展覽揭幕，精神睇嚟唔錯，但無發言。港大饒宗頤學術館館長李焯芬致辭時宣佈，饒宗頤學術館稍後搬往鄧志昂樓，佢話饒公上世紀50年代起，曾任教港大中文系10多年，而當時嘅中文系，就係位於鄧志昂樓㗎嘞。
