星期一金價大跌，拖冧埋地上最強嘅美股、日股，加上人行噚日做580億元人民幣正回購收水，就咁睇形勢相當惡劣，不過內地A股能夠喺壞消息下由跌轉升，港股收市只跌100點，似乎有勇敢嘅聰明錢撈底，睇嚟港股中短線有見底希望。
其實晉佳近幾日已經唔多睇淡，如果持有優質股，拉勻應該唔會點損手，配合個市拗腰反彈，優質股理應升幅更大。其中一隻可以留意就係傢俬股敏華（1999），走勢唔差，舊年8月開始出現大升浪，股價由低位升超過兩倍，上月出現整固，個市跌得咁慘烈股價仍算硬淨，本月喺6.80元左右有支持，噚日反彈3.8%收報7.20元。
敏華主要經營「芝華仕」品牌嘅梳化，佔收入約九成，截至去年9月底，上半年度每套平均售價7,285元，按年升1.3%；售出29.86萬套，大增13.6%。價量齊升，表現唔錯。
估值唔貴兼有盈喜
梳化產品周期同樓市有莫大關係，以半年業績數據計算，美國銷售佔54.7%、內地佔24.9%，可以當敏華係半隻美國樓市概念股，而美國上半年度嘅銷售增長達20.8%，非常見得人，由於晉佳睇好美國樓市，因此相信敏華美國業務喺未來有一定上升空間。雖然內地銷售同期只升2.5%，但舊年9月之前，正值內地樓市低迷時期，能夠keep住銷售唔跌都算係咁。
晉佳朋友W先生報料，舊年年中去廣州行過幾個傢俬城，雖然鬼影都唔多隻，但唯獨敏華旗下芝華仕有人睇吓。睇嚟佢嘅產品，內地人都受落。
敏華喺4月3日收市後發盈喜，但適逢翌日大跌市，隻股暫時hold住唔炒。假設敏華全年純利按年增幅，係一般盈喜基本門檻嘅五成，下半年純利就有2.36億元，較上半年升7.5%，按年增幅更高達一倍。至於估值方面，敏華市盈率14.5倍，由於中美業務都有增長空間，估值絕對唔算貴，短線以16倍作為目標價，可睇8元，中線持有亦可，明顯跌穿6.80元即止蝕。
晉佳
本欄逢周一、三及五刊出