港股壞消息一籮籮──金價大插水、內地禽流感繼續蔓延、阿爺GDP遜預期，加上美國發生疑似恐襲，拖累港股最多跌近300點，埋單則只跌100點，初步在21600搵到支持。不過，戰友們切勿掉以輕心，事關2月底至3月頭期間，恒指三次下試22500都守穩，最後卻以裂口跌穿，𠵱家都未返家鄉。未確認見底前，落場只宜小注，贏少啲總好過輸大鑊。
弱市下仍有強股，偉易達（303）噚日重返紅底行列，收報101.60元，升2.7%，兼創上市新高。呢隻產銷電訊及電子學習產品嘅工業股，近五成溢利來自北美市場，成功食正美股復蘇狂潮；高息政策亦令股價越升越有，去年全年派息76美仙，現價息率達5.8厘。
截至去年9月底止半年，偉易達錄得盈利9,120萬美元（約7.1億港元），增長3.1%，毛利率保持30.4%，但手頭現金半年卻大減六成，應收賬及應付賬亦持續上升，現價高追不無風險，等放榜睇清盤數再落注都唔遲。
唐牛