【尖沙嘴】郭富城拍嘅電影《寒戰》喺金像獎大豐收，前日佢就攞埋隻影碟送畀佢嘅練馬師方嘉柏。當日3點鐘城城揸住架紅色法拉利去到尖沙嘴洲際酒店，自己泊好車至將車匙交畀職員。跟住佢就去咗酒店咖啡室，原來方嘉柏已經喺度等緊佢，兩個人老友鬼鬼一碟薯條兩份食，見佢哋密密斟，唔通有賽馬貼士？
城城上月喺紅館舉行一連九場演唱會，前晚佢喺灣仔宴請一班台前幕後工作人員慶功，佢話好享受做演唱會：「演唱會係生命一部份，𠵱家係中場休息，好似音樂劇咁係永遠都唔會完。」
對於鄭中基攞最佳男配角時話要放低晒音樂先拍電影，城城話：「好似成龍咁係國際級演員，好威，唔通我去荷李活又打功夫咩，我以拍好戲同有好票房為目標。」
採訪：胡比、李志明
攝影：吳耀輝
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/