閱報方知，原來今年剛好是手提電話面世40周年。而第一通的電話是由一位在摩托羅拉（再過幾年，年輕一代怕且冇人會知「摩記」呢個係乜嘢品牌）任職工程師的先生，於1973年4月3日用該公司一個長30厘米（成呎高），重1.135公斤的產物打出，稱為「磚頭」實不為過。
自此開始，人類正式進入手機世紀，「電視」曾經亦被認為是對人類影響至深的發明，不過相對手機，尤其是智能手機的出現，看來是完全比下去，因為就算冇咗個電視機，家陣都可以用手機觀賞電視節目。
我真的記不起第一次用手機是打給誰，畢竟已是25年前的舊事，那時候仍在學，過的卻是「勤工儉學」的生活，即係返工多過上堂，都仲未計「上莊（擔任學生會職務）」，實情忙過𠵱家，所以就買下人生第一部無線電話。當時確實是奢侈品，足以用嚟炫耀招搖，起碼成間學校，連講師教授都冇邊個一機傍身。
我那部只是日本手機，東芝（Toshiba）出品，冇錯，又係後生已然不知的牌子，比摩記的「大水壺」平咗一截，勉為「小水壺」，不過都要盛惠萬六銀，現足以買到3部三星「碌2」！分期付款計息之餘，還要另外畀多少少買埋保險，回想起來，已是隔世。
每名港人平均兩部手機
今日手機的普及程度近乎氾濫，根據政府通訊事務管理局去年公佈的數字，本港按人口計算的流動電話服務用戶滲透率達217%，也就是說，每名港人起碼有2部手機，比起歐美和亞洲各「手機發達國」平均有20%手機用家有超過1部手機的數字更驚人。而單單去年，全球仍售出17億部手機，三星、蘋果及諾基亞這三大製造商，已然瓜分市場份額過半，合共賣出逾8.5億部手機。諾基亞（我大大話話用咗成十幾年）雖能躋身三大，經營已是險象環生，想想「摩記」、愛立信這些亦曾大賣的日子，一切不過雲煙。
最始料不及的是，當初發明手機，目的是讓用者可以「保持通話」（有電影就以此為名），隨時交談。
然而，最近你又花咗幾多時間透過手機同人傾偈？除非係你阿媽打電話搵你，不過你個仔，佢個孫已經教緊阿嫲點用WhatsApp同啲icon，遲吓都可以慳番對答。亦難怪有外國調查顯示，每一個手機用戶平均一天只與其他人「佔線」通話12分鐘，而其他時間則全部「在線」！
所以外遊訂酒店，首要考慮就係「有冇免費wifi先？」，到埗急住check-in都係為咗攞password。除咗短訊、WhatsApp、「飛卜」、微博、打機、上網、看書、讀報，尤其係睇本報「動新聞」，全部都係網上完事，說不定你現就是低頭閱拙文，又據說內地民眾有八成慣以網絡獲取新聞資訊。差點忘了，真係有六成四人會以手機煲劇！
時移世易，手機製造商或會此起彼落；不過手機主宰現代人這件事，已是不歸路。亦難怪有很多人認為，如果沒有了手機，他們連一天也過不了，而我只知沒有手機，昨天發不到稿，今天也是過不了。
盧先亞