「身處高峯曾共阿姐天天都相見，偶爾碰上了秋官步伐未凌亂」——《幾許瘋語》
「都只因我阿嫂，專登揀清明掃墓，每次也掃到我哋索氣，我不知點算好」——《掃墓》
「誰說朋友冇一個長壽，全為我豬乸亦停留」——《陪着你嘔》
「惟有老闆可以常擁有，伙記做嘢不可強求，不強求不強求永遠忍受，如必須減薪我承受」——《阿順的故事》
「地鐵要加我成全，我有發言但無權……要過路，留下買路錢就通過」——《留下買路錢》
年過30歲的香港人，都會記得這些八十年代《歡樂今宵》（ＥＹＴ）的二次創作惡搞歌，它們出自ＥＹＴ編劇的手筆，吳連惠及黃國輝就是其中的無名英雄，他們的二次創作唱出港人心聲，歌詞啜核抵死得令人笑到噴飯，絕對拍得住當年大師黃霑、林振強及鄭國江的填詞妙作！
撰文：余燕儀
吳連惠，花名大口連，曾在無綫擔任編劇，現轉投黃玉郎旗下，以筆名文敵為漫畫《春秋戰雄》及《神兵》做編劇；黃國輝，現職無綫編審，他是20多年的老臣子，作品包括《季節》、《尋秦記》及《東西宮略》等，兩位揸筆搵食的無名英雄，就是玩二次創作《幾許瘋語》、《掃墓》及《陪着你嘔》的幕後玩家。
吳連惠日前接受本報記者專訪，他徐徐呼出煙圈說：「其實呢啲歌係惡搞始祖，早期鄧寄塵、鄭君綿嘅粵曲已經有呢種宣洩，不過當年佢哋曲調比較窄，而我哋當時樂壇百花齊放，好多出名歌星同耳熟能詳嘅首本名曲，當時ＥＹＴ同社會好接近，我哋都係草根出嚟，感應到社會需求，社會有乜ＥＹＴ就有乜，要投訴就有投訴。」
扮嘢兩大因素
讀書時已愛玩填詞的黃國輝，加入無綫後即把握機會發揮，他說：「嗰時我哋係𡃁仔，梗係想喺節目填到首歌，呢個過程經過少少爭取，因為大騷通常都係搵鄭國江、黎彼得填詞，但嗰啲貴嘛，搵佢哋又要時間，我哋作為新入行編劇好就手，兩、三日就可以交歌。」當年他們玩惡搞歌成功，因為配合了天時地利人和，黃國輝說：「嗰時歌星形象出過𠵱家好多，梅艷芳好多形象畀你扮，𠵱家容祖兒雖然好紅，但要扮佢𢱑頭，歌都一樣，嗰時一首歌上榜可以幾個月，𠵱家兩星期冇咗，扮嘢要有兩個特質：歌星要紅，首歌要hit。」
吳連惠指當年惡搞歌播出次數不多，能流傳到今日，他都覺得很神奇，至於創作靈感，他笑說：「談唔上特別大靈感，只係反映時事，惡搞歌特色係唔可以改太多，改晒觀眾唔係好知乜歌，好似《掃墓》講到個困苦，由大埔攞住一大堆嘢上去，一句已點題；《凶凳》打牌少隻腳，係人生最慘嘅事，呢啲就係生活。」黃國輝補充說：「《幾許瘋語》一樣好簡單，𠵱家社會仍好多人有抑鬱，寫呢首歌我哋有個假想——五台山台長，廣播道係人都識佢，佢鍾意同藝人打招呼。」
雖然過了很多年，但很多歌詞仍十分貼切現今社會，好似《留下買路錢》及《阿順的故事》，吳連惠嘆謂：「十幾年前所寫嘅歌詞，今日社會仲用到，呢個唔係我哋永恒不朽，係社會問題不解，係好大悲哀！」有網民更激讚《儍咀》歌詞「這夜我又再獨對夜半無聊的渣戲」：「第一句就講中𠵱家ＴＶＢ同ＡＴＶ啲衰樣同廢。」仍在無綫任職的黃國輝尷尬地說：「半夜重播都唔慌好嘢，尤其我哋年代一定係粵語長片，心情唔好時睇咪覺得係渣戲囉！」
踩人要有底線
當年惡搞歌配上盧海鵬、廖偉雄、莊文清及吳麗珠等的扮嘢絕技，令人拍案叫絕，黃國輝笑說：「ＥＹＴ踩人有底線，好似扮周啟邦夫婦，只係扮佢哋神態，誇張佢哋特色，唔係為踩而踩，周啟邦夫婦好熟我哋老細，周太傳話唔介意我哋扮佢，不過扮靚啲得唔得？仲問有冇需要攞鑽飾出嚟幫手？羅文都話好鬼嬲我哋，但睇完《幾許瘋語》後笑晒，佢覺得阿鵬扮佢好似，服咗阿鵬！我哋踩人但唔會傷害人，開完玩笑之後會兜番，好似嗰時阿B（鍾鎮濤、章小蕙）兩公婆，話佢哋恩愛到近距離係鬥雞眼，對白少少挖苦，聽講B嫂嗰時唔高興，喺屋企喊。」
對於時下的二次創作，黃國輝認為水準也不錯：「OK㗎，只係唔鍾意太多粗口。」吳連惠亦認同：「創作每段時間有唔同特色，𠵱家特色如果能減少粗俗語言，多啲用文字技巧會比較豐富，雖然唔可以批評人嘅表達能力，但如果只有用粗口令觀眾有反應，我覺得可能本身唔係演繹者問題，係社會悲哀！」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/