快將再為人父嘅羅嘉良噚日接受商台訪問，佢話太太蘇岩仲有廿日就剖腹產女，原因兩公婆考慮到年紀大，剖腹較為合適，佢亦會入產房見證囡囡出世一刻。事隔14年再為人父，佢話：「心情興奮，今次睇住太太成個懷孕過程，係非常珍貴嘅經歷，上次囝囝出世忙住拍《創世紀》，所以到生咗先去醫院。」
坐月後返北京住
在港分娩後會去深圳坐月，然後返北京住，問到嘉良點解定居北京？佢話：「老婆喺北京住咗十幾年，我係男人可以遷移基地，加上好多工作以北京為基地，最緊要係我好愛我老婆，到囡囡長大先再考慮會唔會返香港。」至於會唔會再追多個小朋友，嘉良坦言話想生多一個，但一切尊重太太意願。講到未能夠畀囝囝一個完整家庭，佢話：「冇法，係天意。」佢透露兩家人曾經一齊同枱食飯。而蘇岩亦喺微博大呻肚大如籮令佢走唔郁，就連體重都增加近50磅。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/