娛樂圈富豪謝霆鋒，除咗拍戲亦鍾意投資物業，舊年用超過2億元連環掃入中環擺花街兩個地舖，曾經成為城中熱話。聽聞其中一個地舖最近以月租20萬租出，雖然加租1.7倍，但回報只得2厘左右，低到冇朋友，隔籬個吉舖仲放緊租，睇嚟呢個真係長線投資！
加租1.7倍 月收20萬
謝霆鋒老闆楊受成一樣鍾意投資商舖，謝霆鋒唔知係咪受佢影響，舊年中先後買入擺花街26同28號地舖，成交價分別1.17億同9,120萬元，孖屐當時聽到哇哇聲。兩個舖面積都係1,100呎左右，前者買入時有間時裝店租緊，後者交吉。
謝霆鋒原本打算將兩個舖合併一齊租，可惜兩個舖中間隔住一條大廈樓梯，冇咁實用，最終惟有分開租。新近租出嘅26號舖，之前月租7.5萬，今年約滿，租客已經搬走咗，𠵱家轉租畀另一間時裝店，月租加到20萬。即係話，呢個舖每年為謝霆鋒帶來240萬元租金收入。隔籬仲係吉嘅28號地舖，聽聞都係以20萬放緊租。
歌手古巨基舊年都喺擺花街以5,400萬元買入一個面積約500呎嘅22號地舖，原本放租12萬，幾經考慮最終留為自用。呢個地舖投資熱潮究竟熱完未呢？
李華華
mailto:[email protected]